AF268: 32v

38 Diñle neyden dėdi ol merd‑i ḫudā
Qıldı çün esrār‑i ḥaqqa ibtidā

39 Enbiyāyı neyle taʿbīr eyledi
Naql ėdüb neyden meʿānī söyledi

40 Lafẓ‑i nāyı ṣūret ėtdi ol velī
Līk maqṣūdı nebīdür yā velī

41 Yā özidür yā Muḥammeddür murād
K’oldı bunlar maẓhar‑i rebbü l‑ʿibād

42 Maẓhar‑i ḥaqdur egerçi ne ki var
Var‑durur anlarda nevʿ‑i iḫtiyār

43 Līk bunlar maẓhar‑i fānī‑durur
Fiʿl ü qavli cümle rebbānī‑durur

44 Küllĭ vü cüzʾī bularda iḫtiyār
Qalmamışdur iltifāt u iʿtibār

45 Bu cihetden beñzer ehlü llāha ney
Ṣāḥibinüñ nefḥasından oldı ḥayy

46 Ṣāmit ü sākit‑durur aṣlında nāy
Nefḥa olmayınca qılmaz hūy u hāy

47 Nuṭqa daḫı gelse nā‑geh nefḥadan
Yine hem çıqmaz usūl u perdeden

48 Māsivādan hem tehīdür bāṭını
Enbiyā gibi şikestedür teni

49 Ḫidmete bel baġlamışdur qat qat
Hem‑nefes bulsa vėrür cāna ḥayāt

50 Gūş qıl ney ne ḥikāyetler ėder
Ayrılıqlardan şikāyetler ėder

51 Çün vaṭandan qıldılar beni ıraq
Ṭoldı āvāzum Ṣifāhān u ʿIrāq

52 Ėdeli ecsāma bālādan nüzūl
Ḥālüme aġlar nüfūs‑ile ʿuqūl

53 Naġmemüzden fāş olur esrār‑i ẕāt
Maẓhar‑i ẕāt oldı esmā vü ṣıfāt

54 Merd ü zendür gūn u esmā ey ăḫī
Münfaʿil birisi fāʿil bir daḫı

55 Şerḥa şerḥa qalmadın sīneñ firāq
Fehm olunmaz şerḥ‑i derd‑i iştiyāq

56 Her kişi kim ola yārından ġarīb
Nāle vü efġān ėder olmaz ʿacīb

57 Aṣla vaṣl olmaq diler eşyā qamu
Aṣla ṭālibdür qamusı sū‑be‑sū

58 Her kişi gendüye yār añlar beni
Fehm qılmaz ārda cān u teni